2Ti 4 | KUD | STEP | Timoti, amvenuwamwau yamohego Yaubada na Yeisu Besinana mehediyai iya mwalomwalowoidi yo mayawahidi mata ilauvetalaedi, iya howola abo imahalavauyoma na iloinaegita.

2 Timothy 4

1 Timoti, amvenuwamwau yamohego Yaubada na Yeisu Besinana mehediyai iya mwalomwalowoidi yo mayawahidi mata ilauvetalaedi, iya howola abo imahalavauyoma na iloinaegita. 2 Amvenuwamwau teina yamohego: Hauga maudoina upaihowa wahiyala na wasane uwalo mahalavaei, hauga vitavitaidi yo hauga yaliyaya aidiyai, na tomowa aidiyai uguguya ta hiyemidi na hinage uꞌabidumwaludi na uꞌabiye wahiyaladi, ta ginaulidine teina aidiyena uveꞌita moiha mayam alamaꞌiꞌita.

3 Wuwuna hauga hilalaoma aidiyai tomowa veꞌita dumwaluna mata hitaꞌwataꞌwataedi, na vali veꞌita adi benali namwanamwana aidiyai himulita. 4 Na veꞌita vagadi adi mulita aidiyena veꞌita moiha hilaugabei. 5 Owa havena dova hiya. Hauga maudoina utowolo wahiyala na miya vitaina aidiyai uꞌalamaꞌiꞌita, na wasana namwanamwana uwalo mahalavaei. Teina ainaena owa mata taupaihowa wahiwahiyalana Yaubada yana paihowa ainai.

6 Yau yatalamwegau ta dova yapwaoliyoigau Yaubada ainai ta muhamuhana yagu paihowa yaveꞌovi na baleꞌu teina yalaugabai. 7 Yaubada vehabana bada yaꞌalehaꞌo, na yagu sagena bada yaveꞌoviyaꞌo, eeta hauga maudoina yagu yemidi Besinana ainai. 8 Ainaena mata howola abo yada Bada agu maiha imohegau mayana loina dumwaluna ta ebe yana ahubena imahalavama, ita ana taumulitao ada maiya imohegita.

Walo yana abaꞌovi

9 Timoti, nuwanuwagu ulau mwayamwayauma. 10 Dimasa bada ilaugabaigauꞌo, wuwuna baleꞌu mumugana nuwana ivai ta bada ilaoꞌo Tesalonaika. Kelesenisi hinage bada ilaoꞌo Galetiya, na Taito bada ilaoꞌo Dalimetiya. Hiya agu haguwone maudoidi hilaugabaigauꞌo. 11 Na Luke ibom itupwa.

Ta yam laoma ainai Maki ulauvaiyama, wuwuna iya agu tauhagu namwanamwana.

12 Tikiko bada yavetamalenaꞌo Epeso ainai.

13 Ebe ulalaoma tupwana yagu ginauli uvaidi, agu luwuluwu mwalona Tilowasi ainai yalaugabaidiꞌo Kaposi yana vadai, yo yagu pepa abalaulele yo yagu bukiwo, hiya nuwanuwagu uvaidima.

14 Pwawati ana taupaihowa, yehana Alekisana vitai mwalaꞌina imohegau. Ainaena ana maiha Yaubada howola abo imohei. 15 Alekisana yada veꞌita iveꞌaleha aliliyei. Ainaena owa uꞌita avivinigo.

16 Yagu lauvetala mugai ainai nigele teya iyahaguigau, na yadi meheuhi ainaena hidena gabaegau na yabom, ta Yaubada yadi yababa teina nigele iyamaiha.

17 Na yagu lauvetala ainai Yaubada ihaguigau, ta wahiyala imohegau, na wasana maudoina yawalo mahalavaei hiya nigele Yudeya aidiyai. Hinage Yaubada yana hagu aliguwai ta laiyoni awanaena ihaloigau ta namwanamwana ainai imwamwauwigaune. 18 Na vitai aidiyena yada Bada mata ihaguigau ta yana abaloina galewai ainai yaluwu. Yaubada tanoꞌowei wuwuna yana wasawasa miyamiya vateyaina. Moiha.

19 Yagu velau Pilisila yo Akwila, na Onesipolo mayana huhuwo aidiyai.

20 Elasitosi imiyamiya Kolinita ainai, na Tilopimo iꞌasiyebwa Melito ainai ta yalaugabaeine.

21 Na ulau mwayamwayauma wuwuna muhamuhana gwaugwau ana hauga imahalavama. Yubulosi yo Pudinisi yo Linosi yo Kalodiya yo hinage tahidao yadi velau alimwai.

22 Yada Bada baidam yo aluꞌaluwam iꞌabiye wahiyala, na owa yo yam bodao iveꞌiꞌilaegomiu.